L'he visto maje?


Nu mare traggico
‘ncrespato d’onne
‘a riva, ‘nterra ‘a rena,
na rezza che chiagne
lacrime ‘e solitudine
l’he visto maje?

Na notte senza luna
e, arravugliato e nniro,
senza respiro ‘o cielo
cu’’e stelle annascunnute,
comme a tanta creature,
sott’’o mantesino d’’e nuvole;
l’he visto maje?

N’albero guagliunciello
cu’’e ffronne ancora verde
ca ‘o viento fa spezzà,
senza pietà, accussì, ‘mpruvvisamente,
l’he visto maje?

N’auciello appucundrute
ca cerca ‘o nido
comme n’ommo ‘o ppane
e tutto appaurato
cercanno prutezione
se chiagne na frunnella e na cajola;
l’he visto maje?

Si tutte chesti ccose, ammore mio,
tu ‘ncopp’a strada toja
nun l’he truvate ancora,
si overamente nun l’he viste maje
nun ‘e ccercà
basta che guarde ‘nfunno a chistu core
e a’ una a’ una
certo ‘e può truvà.