'E duje cardille


Nascettero ‘mparanza duje cardille
pigliajeno doje strade differente:
uno ‘ncopp’a na loggia ‘e nu Signore
chill’ato dint’’o vascio ‘e nu pezzente.

‘O primmo dint’’a na cajola d’oro
cantava sempe d’’a matina a’ sera;
teneva ‘e ffronne, l’acqua, ll’aria, ‘o sole
steve comme a n’eterna primmavera.

‘O sicondo, ‘int’’o vascio ‘e nu pezzente,
malato e sempe chino ‘e pecundria,
senza luce, cu’ ll’aria malamente
era ‘o ritratto d’’a malincunia.

So’ muorte ‘o stesso juorno ‘e duje cardille,
e che vuò fa, guè, manco a farlo apposta,
duje destine, p’’o ricco e ‘o puveriello
pure pe’ l’animale ce vo’ ‘a sciorta.

‘O primmo è stato priesto ‘mbalzamato
mò stà dint’’o salotto pe’ bellezza,
chill’ato, ‘o frato, nato disgraziato,
è ghiuto ‘int’a nu cummulo ‘e ‘mmunnezza!