Destinazione nord


Campagne abbandunate;
albere cu’’e rame ca se stenneno
deritto verso ‘o cielo
quase a cercà pietà.

E moreno
pecchè so’ trascurate
‘a chi l’ha tanto amate
e mò l’adda lassà
pecchè nun po’ campà
cu’’e frutte
ca so’ pavate a prezzo ‘e carità
e veneno vennute
dint’’e puteche ‘e tutt’’e verdummare,
comme a brillante rare…

Miseria ‘e na terra
ca putesse dà oro
e invece dà chiummo!
Pecchè ‘a dint’’e ccarne ‘e nu bracciante
gente senza cuscienza
addà tirà cchiù sanghe ‘e na mignatta
pecchè s’adda fa chiatta
appezzentenno all’ate.

Gente ca s’arrecchisce,
a nnomme d’’a camorra,
s’accatta
cu’ na magnata ‘e fave
‘o campagnuolo e ‘a terra:
tutt’’a fatica ‘e n’anno!

Da ‘e Puglie, d’’a Calabria,
da Napule ogne juorno
parteno tanta trene
destinazione nord!

E restono cca bbascio
sule guagliune e femmene
mentre dint’’e ccampagne
chiagneno abbandonate
ll’ore passate inutile
e frutte e tutte ll’albere d’’o sud.