Comme vurria


Comme vurria
nun essere accussì sentimentale;
comme vurria
nun chiagnere
vedenno na fronna,’ngialluta all’autunno,
spezzata da ‘o viento.

Comme vurria nun chiagnere
vedenno na stella
cadè dint’’o mare,
vedenno na faccia
patuta ‘e dulore
vedenno ‘a tristezza
‘e nu juorno ca more.

Comme vurria tenè
nu core acciaro!
Invece io soffro
p’’e suffrenze ‘e ll’ate
p’’e traggedie, p’’a famme,
p’’e puvertà d’’o munno.

Comme vurria nun essere,
unico ammore mio,
perdutamente ‘nnammurato ‘e te,
e nun sentì l’affanno
ca me ‘nzerra ‘o respiro
quanno ce appiccicammo
e t’alluntane ‘a me.

Ma po’ na Croce essere maje doce?
Po’ maje na spina addiventà na rosa?
Pirciò ‘stu core mio non trova pace
e va cercanno sempe quacchecosa
ca desse all’ombra nu felillo ‘e luce
senza affunnà ‘int’’all’oscurità…